Nos a puntra alumnonan di Colegio San Antonio cu a participa na Arte di Palabra (AdP) y cu a representa Aruba den e competencia interinsular di Arte di Palabra na Corsou cinco pregunta. 1. Nomber completo 2. Kico bo ta pensa di nos idioma Papiamento? 3. Con bo experiencia tawata di bo participacion na AdP? 4. Un cos cu bo a siña di bo participacion na AdP 5.Bo lo conseha otro pa participa na AdP y Dicon?

Samantha
Mi nomber ta Samantha Garcia-Guevara. Mi ta haya cu e idioma Papiamento ta unico y asombroso. Mi experiencia den arte di palabra tabata hopi leuk y pret, mi a logra comparti mi sentimientonan na un forma bunita. Mi a siña con pa expresa mi mes. Mi ta conseha pa otro participa den Arte di Palabra pasobra e ta e miho manera pa expresa bo mes den un manera cu por mishi curason di otro.Tambe e ta manera pa sigui cu e lucha di Papiamento, e ta aporta na nos lenga materno y mi ta haya esey ta importante y no solamente esey si no tambe e ta hopi hopi leuk.

 

 

 

Loui-Angelo
Mi nomber ta Loui-Angelo Bislick. Papiamento ta algo maraviyoso y unico y nos mester mantene asina. AdP tawata un experiencia nobo, dushi y unico. Mi tawata tin hopi nervio pero ora mi a subi stage mi a laga tur mi miedo y nervio disparse y a sintimi fuerte. Mi a siña con pa expresa mi mes i pa no tin miedo di subi escenario y e ta haci bo sinti fuerte. Mi conseho ta si!!!!  Paso asina bo por expresa bo mes y mustra tur hende cu bo ta un hoben fuerte cu no tin miedo, y si bo no gana no ta nada paso e cos importante ta cu bo a purba y bo a duna tur di bo banda y esey ta haci bo un campeon sigur.

 

Xie-Marie
Mi nomber  ta Xie-Marie Larmonie. Mi ta pensa cu Papiamento tin un lugar special pa mi, pasobra e ta un manera cu mi por expresa mi mes y e ta e prome idioma cu mi por a papia y prome hopi otro cos, entre otro mi prome zundranan. Mi experiencia tabata hopi bon. Hopi dushi cu mi por a expresa mi mes y  mi sentimentonan  na un manera bon y cu bo por conta otro loke bo ta sinti como tambe bo pensamentonan. Pa ta bo mes y pa bo ta sigur di bo mes y no tin un otro hende cu no sa bo storia of poesia mas bon cu bo pasobra abo a skirbie y abo sa con pa expres’e . Ora cu bo ta expresa bo storia/poesia hacie cu alma y curason. Por ultimo purba laga otro sinti loke bo ta sinti. Si, pasobra si bo no purba algo bo nunca no sa kico bo por y kico bo no por y e ta un bon manera pa experesa bo mes.

 

Dayron
Mi nomber ta Dayron Vrolijk. Mi ta haya cu Papiamento ta un idioma unico y hopi leuk pa siña. E experencia tawata dushi y e ta algo leuk pa bo experencia. Mi a siña cu bo no mester tin miedo di expresa bo sintimentonan. Si, paso eta algo hopi leuk pa experencia y bo ta echt haya chens di saca tur cos cu bo tin warda den bo mes y bo por traha amigonan/amiganan cu echt por guia bo den AdP.

 

Obi
Mi nomber ta Obi Tromp. Ami kier describi Papiamento den un palabra: dushi. Participa na AdP tawata bon, e tawata mescos cu un famia. Un tawata yuda otro. Loke mi a gana ta experiencia sigur.  Sigur cu si, asina bo ta gana experiencia nobo. Sigur cu si. E ta un experiencia nobo.

Leave a Reply