Ya ta un aña pasa cu D.U.S.H.I. Brassband a ser forma. Bao guia di meneer Remigio Rasmijn un grupo di alumno di Colegio San Antonio a sigui training pa asina entretene scol durante di celebracion di Carnaval.

Potret:  David Kock, klas 3

Skirbi pa:
Lindsey Willems, Valentina Morales, Daylène Kock y Jaily-Ann Werleman
Klas2, Colegio San Antonio

Ta asina cu meneer Remigio Rasmijn a duna workshop di Brassband na un grupo di alumno cu a inscribi y durante algun siman nan a train. E aña aki scol a dicidi di participa den diferente eleccion di Carnaval y pa e motibo aki a yama e grupo hunto pa apoya Prins y Pancho, Reina Hubenil y Señora Carnaval di Colegio San Antonio. E meta principal di e grupo ta trece un dushi ambiente, mustra disciplina, creatividad y union cu ta refleha tambe e mision di nan scol.

Participa den un grupo di brassband ta nifica hopi disciplina ya cu bo tin cu siña seña, tene ritmo, concentracion y tambe condicion. Training ta hopi importante y pesei D.U.S.H.I. Brassband a cuminsa cu training desde november aña pasa dos biaha pa siman den oranan di atardi.  E grupo di brassband ta consisti di 12 alumno y 2 docente. E grupo a siña domina diferente ritmo, entre otro ashe, asambeho, merengue y tamaquiño. Riba snaar tin e siguiente alumnonan y docente: Jean Pierre Sneek, Chris Angela, Joreen Rasmijn, Marver Guedez, juf Ignacio y Diandra Ruiz. Zidane Gomez , Giandric Solognier y John Bedoya ta encarga cu tenor y por ultimo tin Ashton Maduro, Gilson Ras y Manuel Corvacho riba bass drum. Juffrouw Van der Biezen ta lider di e grupo y ta guia pa prome biaha. E mester a siña e seña nan pa guia un brassband: con pa cuminsa, transiciona y stop. Ken cu a presencia un di e eleccionnan por afirma cu D.U.S.H.I.  Brassband y nan lider energetico a pone ambiente sin igual!

D.U.S.H.I. Brassband ta gradici meneer Remigio Rasmijn cu a pone su instrumentonan disponibel durante di training y eventonan. Un danki di curason pa e tempo y pasenshi dedica pa train nos Brassband. E exito di D.U.S.H.I. Brassband ta danki tambe na Subway, cu e ultimo dos eleccionnan a percura pa un dushi sandwich. Hopi danki Subway! Un otro sponsor clave di D.U.S.H.I. Brassband ta Serlimar: danki pa e sosten durante e temporada aki. Por ultimo nan ta gradici tur mayor pa nan cooperacion, team di docente, alumnonan y tur D.U.S.H.I. followers. D.U.S.H.I. Brassband lo continua…