Dia 12 di Januari 2019 Aruba por a presencia e eleccion di Prins y Pancho di Aruba su Carnaval 65. Colegio San Antonio a wordo representa door di Dwayne Damian y Obi Tromp.  Nos Prins y Pancho a uni forsa cu T.O.B. Carnival Group. Na final di e anochi Prins Mal y Pancho Tempo a bai cu e premio absoluto. Nan ta conta un tiki di nan experencia.

Skirbi pa:
Lindsey Willems
Klas 2, Colegio San Antonio

Potret:  Valentino Angela

Dwayne y Obi a tuma e reto di representa nan scol.  Dwayne y Obi ta conoci pa ta hobennan alegre y chasquero. Esaki ta e motibo pakico nan a wordo aserca pa representa nan scol.  Prins Mal y Pancho Tempo a wordo guia y prepara pa Alberto Groeneveldt.

Nan ta conta cu e anochi di eleccion tabata yena cu hopi emocion y alegria. E efectonan di lus tabata haci cu nan no por a mira publico y esey a haci nan nervioso, pero door di e training intenso nan a logra haci nan presentacion sin eror. E tabata un dushi feeling pa ricibi e apoyo di scol en grande. Nan tabata e unico scol cu tabata tin nan mesun grupo di brassband presente y esaki a duna e anochi y nan show un ambiente fenomenal. Dwayne y Obi ta super contento cu e resultado. Nan a traha duro; tabata mester di hopi disciplina pa combina scol y nan training pero it was all worth it!

Finalmente Dwayne y Obi kier a gradici tur hende cu a yuda y apoya nan; nan mayornan cu a duna nan e chance di participa, na Alberto Groeneveldt cu ta un tremendo coach, meneer Lee pa duna nan permiso pa representa nan scol, tur docente, alumno, famia, amistades y publico carnavalesco pa e apoyo y aceptacion.   Nan mensahe pa e temporada di Carnaval ta: “Mayornan, cuida boso yiu(nan)! Hobennan sea conciente y intelligente: keda leu di uso di droga y alcohol. Nos por goza Carnaval sanamente!”