Den edicion 6 di AOS, Gilia Croes, un studiante na Arubiano bibando na Hulanda a skirbi un articulo sumamente interesante pa nos hobennan. Abou, por disfruta di parti 2 di e articulo di Gilia.

Skirbi pa: Gilia G. Croes
Studiante na Hulanda, SDG Youth Ambassador Aruba

E pilot project 2018 a bira un realidad. El’a conta cu un total di 7 participante di klas 5 y 6 cu a representa Scol Primario Kudawecha, Colegio Bon Bini, Sint Franciscus College, Prinses Amalia Basisschool, Colegio Laura Wernet Paskel, O.L.V. Fatima College y Colegio San Hose. E participantenan a ricibi algun training bou guia di Sra. Yolanda Richardson di Universidad di Aruba pa asina por ta mihor prepara pa duna nan discurso na e evento final.

Inald Fernandes Perna, Zurayly Sprott, Raybel Garo Santana, Quincy Dorff, Sadie Taylor, Xianther Gomes y Nicole Danje a duna un tremendo presentacion, elaborando ariba e problema cu nan a identifica den nos comunidad y a trece posibel solucion(nan) na e problemanan aki. Topiconan cu a bini pa dilanti tabata Papiamento den ense̱ansa, consecuencia y solucion pa imigracion illegal, importancia di naturalesa, e efecto di estado fisico di un scol ariba studiantenan, respeta otro Рstop bullying, importancia di educacion. E publico tabata encera nan compa̱eronan di klas, algun invitado special y nan mayornan. E publico tambe a participa activamente durante un charla interactivo duna pa Telefon pa Hubentud tocante Derechonan di Mucha. Ademas, e participantenan a ricibi invitacion di Minister di Asuntonan Social y Labor, Sr. Glenbert Croes pa asina presenta y entrega e documento di nan ideanan na su oficina.

Pa aña 2019 e proyecto lo conta cu un total di 10 participante di klas 5 y 6 di scol basico. Den e añanan benidero, ta visiona cu e proyecto aki ta inclui mas y mas hoben di diferente edad y educacion, cuminsando na agrega studiantenan di enseñansa secundario y consecuentemente enseñansa pa ofishi y enseñansa superior. E mision di e proyecto aki ta pa tur mucha y hoben den nos comunidad Arubano yega na e punto cu nan ta sinti nan mes empodera. Pa nan no ta manera ami y hopi otro, manera mi a menciona den e edicion anterior, cu e sentimiento di ‘mi no tin e balor pa participa’ y pa hobennan ta conciente cu nan tin un bos y cu nan por haci uso di e bos aki. Pues e proyecto aki ta pa duna hobennan un plataforma pa pone esaki den practica. E vision di e proyecto ta pa crea un ‘mind-set switch’ den e comunidad Arubano. Pa nos ta un pueblo mas critico cu no ta tuma tur locual ta bisa y duna na nos como e berdad sin cuestion’e. Mas ainda, pa no solamente cuestiona pero tambe activamente participa den forma di sugeri critica constructivo, alternativanan y/of solucionnan. Di e forma aki nos tur como cuidadano, sea grandi of chikito, por aporta na e mehoracion di nos comunidad y nos pais Aruba.