Maria College MAVO ta conoci como un scol hopi uni y activo den nos comunidad. Fuera di tur e actividadnan di scol, Maria College tur aña ta organisa un torneo di futol pa su alumnonan tambe. Dia 11 di april 2019, Maria College a organisa e torneo aki riba e veld di RCA unda e alumnonan di diferente edad a bini hunto.

Tur aña, meneer Edward, hunto cu e docentenan di LO (Lichamelijk Opvoeding), ta informa e alumnonan di e fecha di e torneo aki y ta duna nan e tempo pa inscribi nan ekipo. E aña aki ta di cuatro aña cu Maria College ta organisa e evento aki y un total di cinco ekipo a participa. Durante añanan e weganan a wordo hunga den un voetzaal y e ekiponan tabata consisti di seis hungado. Pero e aña aki e hungadonan mes a pidi pa hunga riba un veld grandi cu diesun hungado. E ekiponan di Srs. Roland Tromp y Nathan Franken a bay final y e partido aki a termina den pinalti unda e ekipo di Roland Tromp ta sali campeon cu e score di 5-3.

E aña aki, De Palm Tours, Tropical Bottling Company, Splash Park, Total Cleaning y Protec a yuda sponsor e diferente premionan. Esaki a crea un entusiasmo grandi pa e alumnonan partcipa den e torneo  y esnan cu a ricibi premio a keda hopi contento. Un danki special ta bay pa e directiva di RCA, Yesmira Tromp cu a coopera cu e tereno pa Maria College por a organisa e evento aki. Danki tambe na e refereenan, meneer Hubert Solagnier y meneer Romar Arendsz.