Na comienso di mei nos a haya un mensahe spontaneo den e inbox di e Facebook page di scol. Christie di Mo-B Lab Aruba a tuma contacto cu nos y kier a sa si nan por a pasa scol, comparti conocemento y ofrece nan servicio na e alumnonan di Colegio San Antonio. Mas cu claro nos a bisa nan cu si y a ricibi nan cu man habri!

E Mo-B Lab ta un ‘bus’ cu desde su comienso a bishita diferente scol basico y tambe Traimerdia. Awo ta toca turno na scolnan secundario.

Den e Mo-B Lab alumnonan por a siña entre otro diseña cu 3D modeling y printing, laser cutting, vinyl cutting (sticker) y tambe aspectonan di electronica manera programa cu Arduino, Little Bits y Google cardboard. Por ultimo Christie di Mo-B Lab a reta e alumnonan di San Antonio cu e wega di concentracion Mindflex.

Nos kier yama danki na Christie y tur otro personal di e Mo-B Lab pa nan tempo y pasenshi cu nos alumnonan.

Ps. Bo tawata sa cu e Mo-B Lab ta e bibliobus bieu cu a wordo renoba cu e meta pa promove ‘digital literacy’ y ’21st Century Skills’?