Tempo cu mi tabata prepara pa bay traha na Medio Oriente, mi a bishita un tienda na New York caminda nan tabata bende sistema di zonido di calidad halto. Una bes den Big Apple mi a cumpra algun disco di Joan Baez kende mi a scucha e dia cu el a bin canta na University of Kansas tempo cu ami a studia aya. Na e tiendanan tabatin un camber specialmente pa demostra e sistemanan di zonido cu nan tabata bende.

Skirbi pa Clyde Harms
Presidente Honorario, Nuevo Mundo Foundation

 

Ora mi a saca un di mi disconan pa haci e demonstracion, e cabayero a remarca: “Mi ta mira cu abo ta un fan di Joan Baez. Ami tambe ta admira con Joan Baez ta plama su mensahe di derecho humano, husticia social, igualdad y paz cu su bos angelico. Su guitara ta manera un harpa, bo por scucha cada nota puro y cla, pero e no tin e alcance di zonido cu nos ekipo ta capas di produci.” El a saca un LP di musica di Jean Sibelius, e compositor Finlandes. “Cu esaki bo por aprecia hopi mas e capacidad y claridad di nos sistema di zonido. Si bo kier disfruta e alcance completo di zonidonan puro y cla, bo mester scucha musica manera esaki.” Y en esencia, esaki ta separa musica clasico di musica popular. E alcance completo.

Sibelius
E dia ey mi a scucha Sibelius cu atencion na detayenan. Su musica ta cubri tur zonido cu mi por a imagina y e diferencia entre nivel di duro y suave tabata resalta den mi oido. Un momento mi por a scucha e instrumentonan di cuerde toca na un tempo rapido; despues, hunto cu e flautanan, nan ta toca e parti melancolico produciendo zonidonan casi inaudibel y diripiente e trompetnan, cimbal y timpaninan casi ta tira mi for di mi stoel. E les a registra den mi mente: Si bo kier disfruta e alcance completo di zonidonan puro y cla, bo mester scucha musica manera esaki. Sibelius su Finlandia, e ‘defacto’ himno nacional di e pais, ta contene tur e alcancenan. E ta defacto pasobra e pais Finlandia no tin un himno oficial.

 

Aruba Dushi Tera
Nos na Aruba sí tin un himno oficial y mi ta contento cu e grupo cu a coordina e grabacion algun aña pasa di Aruba Dushi Tera pa conmemora e 40 añanan di nos himno y bandera, a uza New York Simphony Orchestra y nos propio musiconan di nivel. Lo tabata hopi mas barata pa uza un grupo crioyo cu musica crioyo, pero e organizadornan indudablemente tabata desea un producto cu un ‘alcance completo di zonidonan puro y cla’, un producto cu ainda lo resalta ora cu Aruba celebra su di 100 aniversario di himno y bandera.

 

Aruba Symphony Festival & Academy
Di 17 te cu 27 di juli 2019 lo tuma lugar e di cinco edicion di Aruba Symphony Festival & Academy y lo tin presentacion di conciertonan cu ‘alcance completo di zonidonan puro y cla’. Como Presidente Honorario di Nuevo Mundo Foundation, mi ta invita abo y bo famia pa e conciertonan aki. Trese bo bisiña y amigonan!

Entrada ta GRATIS pa tur concierto excepto e concierto inaugural y di clausura. Pa mas informacion y e programma completo, bishita www.arubasymphonyfestival.com.

Leave a Reply