“Mi no ta riba e nivel ni tin e balor pa participa” Esey tabata mi pensamento ora cu mi a atende mi prome summer course di Parlamento Hubenil (PH). Te despues di dos aña, ora cu mi tabata un poco mas madura y cu mas confiansa den mi mes, mi a dicidi di afilia mi mes na e organisacion. Na Maart 2017 mi a participa na e National Youth Debate presencia pa Su Mahestad princesa Beatrix, cual tabata un honor inmenso. E proyecto tabata super bon organisa pa PH y e debate a cana sublime. Pero loke si a gara mi atencion ta e falta di interes di hobennan pa participa den e proyecto.

Skirbi pa:
Gilia G. Croes
Studiante na Hulanda, SDG Youth Ambassador Aruba

Na 2017 mi a gradua for di VWO y a dicidi di inverti mi tempo den algo productivo y positivo. Mi a bay traha como boluntario na SDG National Commission (Sustainable Development Goals). Mi a siña hopi tocante Nacionnan Uni (UN) y tambe e SDGs, di cual mi a crea un interes y importancia p’e. Na Juni 2017 a tuma lugar e High Level Political Forum (HLPF) di UN na New York City. Sra. Jocelyne Croes, presidente di SDG National Commission, a asercami pa forma parti di Aruba su delegacion como representante hubenil. Cu acuerdo di PH, mi no a pensa dos biaha y mi a gara e oportunidad cu dos man. E experencia aki tabata uno hopi bunita, productivo, inolvidabel y cu un balor inmenso. No solamente personanan cu posicion halto den politica internacional pero tambe hobennan tabata tey presente, cual ta danki na nan pais cu ta encurasha esaki. E hobennan a duna ideanan di con pa mehora algun aspectonan di nan pais y tambe a duna ehempel di cierto proyectonan cu ta andando, encarga pa hoben! Mi a keda sumamente impresiona y asombra. Pero mas importante: mi a keda inspira! Mi a pensa “dicon na Aruba nos no ta haya oportunidadnan asina mas frecuente? Dicon no ta conoci cu nos hobennan no ta asina well-spoken y out-spoken?”

E analisis aki ta parti di un problema mas grandi cual ta oficialmente documenta. UNCT MAPS Mission Team a crea un documento como guia pa Aruba pa cu e SDGs, yama “A Roadmap for SDG Implementation in Aruba”. Segun e documento un di e problemanan cu nos comunidad ta enfrenta cun’e ta cu nos tin un ‘disempowered youth’. Den otro palabra cu nos hobennan no tin suficiente poder (of un posicion) den nos comunidad y e recursonan pa yega na esaki ta limita. Mi a dicidi cu tumando e actitud di keha sin haci algo pa cambio, mi no ta contribui na nada y mi biahe y experencia na UN lo ta pornada. Pa es motibo, mi a opta pa tuma accion. Un idea a nace: un plataforma pa trece hobennan di diferente edad y educacion hunto pa por expresa nan opinion, idea y mas importante, posibel solucionnan tocante problemanan cu nan ta identifica den nos comunidad. Cu ayudo di mi bon amigo David Quant, nos a logra conberti loke tabata un simpel idea di un simpel hoben den un proyecto concreto cu un mision, vision cu su project proposal y project dossier bou nomber di “E Bos p’E Cambio | Vocifera pa Mehora”. E proyecto a wordo presenta publicamente pa prome biaha na Mei 2018 ora cu mi a ricibi invitacion pa atende Aruba su prome Innovation Summit caminda cu mi a wordo nombra como un Aruba SDG Youth Ambassador. Parlamento Hubenil a afirma pa carga e proyecto, apoya pa SDG National Commission y Futura.

Parti 2 di e articulo aki lo wordo publica den e siguiente AOS.