Cu e meta pa connecta e teoría cu e alumno ta ricibi na scol cu experiencia den e mundo real, Maria College Mavo a lansa e projecto ‘Maria College Gaat op Reis: Caribbean Edition’ na aña 2017. ‘Maria Gaat op Reis’ ta un projecto multidisciplinario caminda tur e materia nan ta traha hunto y durante Maria College su ‘open avond’ e aña aki, e alumnonan a presenta tur projecto cu nan a traha te cu awo.

skirbi pa Tiziana La Torre
coördinator AoS-Magazine

Durante Maria College su open avond, juffrouw Oduber a tuma e tempo pa splica AoS-Magazine un tiki mas tocante e exposicion. E aña aki e alumno nan di Ciclo Avansa 1, banda di nan Science Fair, tawata tin un projecto pa Geschiedenis, Spaans y CKV (Culturele Kunstzinnige Vorming). Pa e projecto di Geschiedenis, Spaans y CKV e alumnonan mester a traha den grupo pa representa un isla of pais. Pa e vak Spaans nan mester a traha un mural, pa Geschiedenis y CKV nan mester a traha un artefacto y pa clausura nan mester a hasi un presentacion di un baile cultural di e pais cu nan ta representa. E taaldorp tambe tawata un aspecto hopi importante di e projecto ‘Maria Gaat op Reis’ y e aña aki tawata tin un Taaldorp cu e thema ‘Back to the Future’ unda alumnonan por a practica cu tur cuater lenguahe. E Taaldorp ta enfatisa riba e parti di ‘op reis’ di e projecto. Ciclo Avansa 1 tambe tawata tin un projecto di skirbimento na Ingles unda cu e alumnonan mester a traha den grupo di cuater persona pa asina nan skirbi nan mesun storia. Bunita pa menciona ta, cu e opdracht aki tawata e comienso di ful e exposicion di e anochi.

Specialmente pa e alumnonan di Ciclo Basico, Maria College a introduci e idea di e projecto den un manera mas simpel pa asina e alumnonan por siña traha hunto y siña custuma cu e concepto. Asina, ora nan bai Ciclo Avansa, nan ta bon prepara caba pa e tipo di colaboracion aki. Ciclo Basico 1 a traha riba projecto nan manera entre otro ‘My Dream Room’, ‘Room of the Future’ y ‘Mi Herencia’ unda alumnonan a ricibi un tour di e diferente monumentonan di Aruba y despues nan mester a traha un maquette di e monumento di nan escohencia. Pa PV (Persoonlijke Vorming) y CKV e alumno nan a traha un informatie ruimte di e diferente SOA’s (seksueel overdraagbare aandoening) unda a enfatisa riba e importancia di cuida bo mes paso ‘bo pasado, presente y futuro ta conecta’.