E di tres competencia anual di Aruba Bank Student Chef Challenge 2018 a yega su final despues di 3 siman, unda 6 studiante di Colegio EPI y EPB cu ta aspira pa bira chef a competi y a gana experencia gastronomico pa bira futuro top chef. E evento corporativo tabata ‘un anochi yena cu sabor’ y den un ambiente ameno.

E obhetivo di e evento ta basa riba Aruba Bank su pilarnan strategico, cual ta We Build y We Care. Como comunidad ta importante pa nos motiva y inspira futuro generacion pa forma parti di nos sector di hospitalidad y turismo, specialmente den F&B. Pa es motibo tambe ta importante pa e industria inverti den hobennan y talentonan local.

E participantenan tabata Yilis Ho, Michelle Verploegh, Marielle Willems, Jeanmary Angela, Kayleigh Tromp y Xanee Erasmus. Nan tabatin e oportunidad pa siña traha hors d’oeuvres for di tres chef conoci na Aruba di e restaurantnan Que Pasa, Café the Plaza y Fishes and More.

E aña aki e invitadonan a fungi come hurado y por a vota pa nan team di studiante y restaurant faborito. E ganado di e Aruba Bank Student Chef Challenge 2018 a bira e team di restaurant Que Pasa, consistiendo di Michelle Verploegh y Xanee Erasmus y chef Ries.

Aruba Bank ta felicita Michelle y Xanee pa bira e di tres ganado di e competencia Student Chef Challenge 2018 y tambe tur participante pa sigui traha duro pa logra nan meta.

Aruba Bank ta gradici e chefnan cu a yuda cada participante y sin laga afo su valioso clientenan corporativo pa asisti y forma parti.

Leave a Reply