Hopi biaha como skirbido mi ta gusta skirbi di diferente topico cu ta pasando rond den comunidad na un manera general. E biaha aki lo un tiki mas diferente, abo como lesado lo conoce un tiki mas di mi como skirbido. Pa e edicion aki di AOS 10 mi lo ta papiando di mi hobbynan, loke mi gusta haci como hoben den mi tempo liber.
Pa cuminsa mi lo haci un introduccion cortico di mi mes. Mi nomber ta Nathan Perez, mi tin 16 aña di edad, mi ta atende scol na Colegio San Nicolas y mi ta miembro di e Parlamento Hubenil di Aruba. For di un edad jong caba semper mi tawata gusta yuda hende boluntariamente. Mi tawata dispuesto pa yuda sin spera nada a cambio, djis cu mi por participa aportando na e causa cu mi ta yudando p’e. Algo cu semper mi a gusta haci for di edad di 6 aña ta canta. Mi a cuminsa prome den koor di misa y djey mi a drenta e grupo di canto “Pitbull Singing Productions” y hunto cu e produccion aki mi a yega di participa tambe na diferente competencia di canto cultural. Mi a yega di participa den Roadmarch, festival di Dande y Un Canto na Aruba su Himno y Bandera cu e gruponan conoci manera, Alma Folklorico, Melodia y Stimami. Tambe mi a yega di participa na grabacionnan di dieferente cantica.

Pues, esey ta e parti di cantamento. Apart di cantamento algo cu mi gusta masha hopi mes tambe ta ‘Trabou Boluntario”. Manera mi a bisa ariba caba, mi ta un miembro di Parlamento Hubenil y aki den, hunto cu tur e otro miembronan, semper nos tawata dispuesto y habri pa tur invitacion pa eventonan cu nos mester yuda boluntariamente. Semper mi ta gusta motiva otro hobennan tambe pa haci trabounan boluntario of join un organisacion boluntario, pasobra esaki por yuda bo hopi den diferente aspecto. E por yuda bo pa bo ta un persona mas social, bo por desaroya diferente habilidadnan masha hopi mes cu por yuda bo ta un hende profesional den futuro y den bo trabou, y e por te hasta bay riba bo CV. Motibo dicon mi gusta haci trabou boluntario ta pasobra mi ta haya un sintimento di satisfaccion ora cu mi wak cu ami como hoben ta haciendo algo bon pa yuda y aporta na e bienestar di mi comunidad. Mi a yega di yuda cu evento di SDG’s na Aruba, Aruba Doet, tambe mi ta skirbi articulo pa AOS den mi tempo liber. Mi ta un Youth Coach pa e programa di “Pitch Time”, tambe mi ta parti di e grupo di panelistanan hoben pa e programa “Aruba Solidario” di CEDE Aruba. Tambe mi ta gusta sinta casi tur atardi cu mi grupo di amigo na biblioteca y yuda nan cu nan lesnan di scol cu ami ta bon den nan y cu kisas nan tin un tiki mas dificultad pa compronde. E aña aki mi a wordo nomina den Poder di Hubentud, un proyecto realisa pa ATHA(Asosiacion Trabao di Hubentud na Aruba) como un hoben poderoso di Aruba den e categorianan di Arte y Cultura, Educacion, Trabou Boluntario y Desaroyo Personal. E nominacion aki tawata algo hopi special pa mi y e tawata un muestra di gradicimento pa tur e trabounan cu m’a haci.
Honestamente mi sa cu falta ainda hopi mas cu mi no por corda awo pa skirbi nan. Pa mi ta hopi sincero esaki ta un articulo cu tawatin hopi dificultad pa skirbie, pasobra mi ta un hoben cu no ta gusta “blof” mes, pero pa e edicion aki toch mi a tuma e tempo pa skirbi di mi mes y mi hobbynan y sin gaña mi mester bisa cu skirbiendo e articulo aki mi mes tambe despues di hopi tempo a bin tuma tempo bek pa mi mes tambe y te hasta siña conoce mi mes miho. Pret no? Danki na AOS!

Terminando mi kier a motiva abo lesado y tur otro hoben di Aruba pa haci loke bo ta sinti bo gusta y ta bo hobby! Bo por hacie den diferente manera, manera ami mes ta hacie pa medio di yuda boluntario den organisacionnan cu ta traha pa e comunidad. No tene berguensa of miedo djis hacie! Y bo mes cu tempo lo wak tur e beneficionan manera ami a hacie.
Uza bo talento den bo hobbynan, bo ta un hoben talentoso!
-Nathan Perez

Leave a Reply