Manera hopi di nos sa caba, nos bida a cambia hopi pa motibo di e pandemia cu a afecta mundo y Aruba. E cambionan nos a wak nan na diferente manera, por ehempel: nos rutina di tur dia, e manera di haya les di scol, distanciamento social y loke cu mas nos lo sinti awo ta e vakantie aki cu pa hopi di nos lo ta diferente. Pa hopi di nos ta un custumber pa den vakantie grandi di scol nos ta haci cosnan leuk cu nos no por haci e resto di e aña, manera bay biaha.

E aña aki lamentablemente pa hopi di nos e biahamento no por ta posibel, pa motibo di e Coronavirus. P’esey e lo ta hopi importante pa e aña aki nos ta mas creativo y pensa riba maneranan nobo pa ‘have fun’ den e vakantie diferente aki, despues di a pasa hopi tempo cera den cas pa preveni di wordo contagia cu e virus.

Hopi di nos ta pensa cu Aruba ta chikito y nos no por haci hopi pa pasa bon den vakantie, pero esey no ta kita cu nos por ta creativo y bin cu ideanan nobo pa pasa bon! Kico mi kiermen cu esaki? Y con nos haci esaki awo? Tin hopi diferente forma!

Corda bon! Aruba ta un isla turistico, den weekend nos por sali cu famia y amigonan pa bay lama y pasa dia hunto.

Tambe nos por tuma tempo tambe pa pasa cerca e famia of amistad ey cu nos tin hopi tempo sin bishita y sinta hunto cu ne den sala of cura y combersa cu otro di e memorianan cu nos a pasa hunto cu nan antes y kisas mientras nos ta pasa dia cerca nan, nos por haci un dushi cuminda of BBQ den cura mes.

Den siman nos por bay wak cinema cu famia, teniendo cuenta cu e protocolnan di precaucion of nos por bay wak pelicula por ehempel na e ‘new Drive In’, cu ya lo ta habri pa vakantie.

Que hubo si nos bay come hunto cu famia den un restaurant aire liber y combersa cu otro y reflexiona despues di ful e aña cu a cab’i pasa y con nos por mehora nos mes tambe!

Aruba tin un parke nacional masha grandi y bunita cu ta publico, unda cu un dia di vakantie nos por bay cu famia henter y keiro eyden hunto y discubri cosnan eyden, manera e grotnan y pasa band’i Palomarga y Vader Piet pa wak e molennan.

Despues di pasa na Parke Arikok nos por sigui keiro y bay diferente otro parti di Aruba. Nos por bay ‘Natural Bridge’, ‘Blackstone Beach’, ‘California Lighthouse’, ‘Baby Beach’ of por ta un museo y pasa tambe wak e diferente monumentonan di Aruba.

E meta cu tur esaki ta pa pasa tempo hunto den famia y reflexiona hunto con creativo nos por ta y con nos por mehora nos mes pa ta un miho persona.

Y sigur cu si nos haci bon uzo di e vakantie diferente aki y ta creativo nos por pasa un bon vakantie!

Leave a Reply